كلمات بعض اغاني الفنان النوبي السوداني محمد وردي
*******************************
وسط الدايرة
وسط الدايرة أجمل نايرة
خلي قلوبنا تطير
وارحلي بينا فراشة حنينة
بين زينات وعبير
ولما الخصلة تدور طربانة
تبقي حرير في حرير
فرحي خلق الله واتّنّي ياشبه القمرة
وارقصي رشي عبيرك فينا وفتحي يا زهرة
أرقصي زيدي الساحة سماحة
نحن معاك نشيل
نغني غناوي ..نحكي حكاوي
لما ندوب في الليل
لا ترتاحي لا تريحينا
لسة الوقت طويل
عمرك كل فرح يا زينة
شيلي من الأفراح وادينا
راقصي البسمة راقصي النسمة
خلي الموجة تدور بينا
أوعي تهدي
كمان اتحدي
يلا جميلك تمي علينا علينا
**************************
نور العين
قلبي الحابيك ما خان لياليك
ما ناسيك الماضي ماتقول ناسي
ما بدل حبو ابدا ماتنكر ليك
لكن الأشواك والنار حواليك
يانور العين
يانور العين انت وينك وين
في اللون الأسمر ذوبت شبابي
وعشقت الجنة وفي الجنة عذابي
صابر وبتألم والمر دا شرابي
ياحليل الراحو ياحليل احبابي
يا نور العين
يا نور العين انت وينك وين
الشعر الناعم بي عطرو اسرني
والوجه الناير بي نورو غمرني
عيونو النعسانة برموش تجرحني
خلتني متيم وين راحت مني
يا نور العين
يا نور العين انت وينك وين
انا والأنغام والعود في ايدي
بحكيلو حكايتي ويعيد ترديدي
واشكيلو همسة أو عذب نشيدي
ياما الأوتار تفضحني من ريدي
يا نور العين
يا نور العين انت وينك وين
****************************
صدفة
صدفة وأجمل صدفة انا يوم لاقيتا
أسعد يوم يومي الحييتا
نور عينية ياما حبيتا
النظرات بريئة وممزوجة بخجل
البسمات تضوي زي نور الأمل
وجهك بين مسايرك زي بدر اكتمل
والشامة في خديدك زي طعم القبل
تسكر قلبي وتشعل حبي يشهد ربي انا بهواك
ما قادر اقولك عن حبي الكبير
وصفو علي قاسي وعايش في الضمير
قدر الكون دا كلو حبي واكبر بي كتير
مالكني محيرني شوف قلبي الأسير
اسألي قلبك يمكن يقدر يشرح حبي أنا محتار
صدفة عيوني شافت ليلي الباكي نور
يا أيام ربيعي عمري معاكي أزهر
فيها الطير يغني ومن الحاني يسكر
عمري فراشة حولك وانت شبابك أخضر
ياما بحبك وبعبد حبك علشان حبك روحي فداك
********************************
ماتخجلى
صبرت ..
واستنيت كتير اتمنى
أمني نفسي واقول
بكرة الجنة ..
ومن بعيد ياما
من جوا قلب بدعيلك معاي
نتهنى ..
عطشتي قلبي
وكل يوم تتجملي
أديني كلمة وسامحيني
وطَوّلي
ما تخجلي ..
يالسمحة قولي ..
استعجلي ..
خلاص كبرت وليك 19سنة
عمر الزهور
عمر الغرام
عمر المنى
اتمنى يوم تجمعنا
جنات حبنا
تبقي الأميرة والبطيع قلبي أنا
ماتقولي لي
مالي ومال الحب أنا
نار الهوى الوقادة
والشوق والضنا
وحلاوة الأحلام
وآمال الهنا
إيه يجمعن غير ال 19 سنة
*********************************
المرسال
مسكين البدا يأمل
أملو يغلبو تحقيقه
والعاشقة جفا المعشوق
الليلة وا سهرو ونشاف ريقو
امش قول ليهو ياالمرسال
عساه يراعي ملهوفو
حبيبك و بي وراك
جارت عليهو وخانتو ظروفو
فقد صبرو شرد نومو
لهيب الشوق خنق جوفو
نحول جسمو شحوب لونو
براك أحسن تعال شوفو
مسكين .. مسكين
براي السويتا في نفسي
قلبي الحب ما واعي
عشق زولا مجافيهو
وما كان للحصل داعي
اقول اتناسي حبو يزيد
تزيد بالتالي أوجاعي
طريق الحب مشيت فيهو
تعذر تاني ارجاعي
مسكين .. مسكين
خطاباتي البوديها
تقول لا بتمشي لا حاجة
وديت ليهو زول مرسال
والمرسال مشى وما جا
بقيت انا والنجوم بالليل
سوا نساهر ونتناجى
والناس اللي كانو سبب
رموني وبقو فراجة
مسكين .. مسكين
*****************************
غلطة
قاسي قلبك علي ليه
قسى قلبك علي ليه
لو بحب يبقى ذنبي ايه
قلبي توب ..
توب من عواطفك
ايه نهاية حبه ايه
غلطة كانت غرامي ليك
وا خسارة دموعي فيك
غلطة قلبي سلمتو ليك
ما كان مكانو وما كان يجيك
يوم لقيتك علي ما كان يوم يا مبدل شجوني هوى
عني ايه قالو عني ايه
كنت تايه وكنت غريب
وانا افتكرتك اعز حبيب
ياما قلبي يخطا ويصيب
والعذاب لي كان نصيب
من عرفتك جفاني حتى النوم يا مبدل شجوني هوى
انت حبك جنيت عليه
كن طلعت القمرة وجيت
ولو حلفت برب البيت
ما بريدك ..
ما بريدك مهما بقيت غلطة كانت وكان ابيت
يا الفراقك علي كان مكتوب يا مبدل شقاي انا
انت حبك جنيت عليه
**************************
بيني و بينك
بيني و بينك و الايام
قصة حب طويلة
شيدناها بالآمال
والعشرة النبيلة
****
قصة حب رواها للايام حناني
نبع الريد سقاها و اخضرت اماني
قال قلبك نساها كيف في ايام قليلة
****
كانت في خيالي الحان في شعوري
اسرار المحنة بتعذب ضميري
حلفتك بي ربك لو في الطيف تزوري
***
ديمة الناس تفرق تمنعنا التلاقي
جمر البين يحرق و يزيد في اشتياقي
يامسافر مشرق ويين ايامهم حليلا
***
ان طالت ليالي و ان جارت علينا
برضنا نحن روح وحده بقينا
من زول العوازل سيبك ما علينا
****************************
يا سلام
ياسلام منك انا آه ياسلام
العيون فيها سهام
والكلام فيه كلام
في حديثك
في ابتسامتك
زينة يا احلى غرام
لديارك جيت يا روحي ليك ازور
ومن كلام الناس والله قد ضاع السرور
في ايدي
ليك هدية
سامحيني واذريني
واقبليها يا بدور
العواذل قالو ليك
قالو ايه
قالو بحب
والله انت وبس
انت في قلب المحب
هددوني
ألموني
عذبوني
بدلوني الفرحة نار وهيام يوم الغرام
ده حرام والله حرام
انت لونك
وانت طبعك
هادي ما فيهو البيشين
تشبهي الفل في الجناين
حتى عطرك ياسمين
بين ضلوعي النار تقيد
ده حرام والله حرام
*************************
يابلدى ياحبوب
عشانك بكاك الريح
عشانك فؤادي جريح
عشانك أنا مقتول
وبموت معاك مقتول
عشانك يا حزن نبيل
عشانك يا حلم جميل
عشانك يا بلد
يا نيل
يا ليل
يا سمح يا زين
يا بلدي يا حبوب
أبو جلابية وتوب
سروال ومركوب
وجبة وسديري
وسيف سكين
يا سمح يا زين
يا وجه مليان غنا
مليان عشق وحنين
يا بنت يادوب
نهيداتا قايمين
شايلين تخا وفي رخا
شايلين بنات وبنين
يا سمح يا زين
يا آهة يا نمة
يا مدحة يا عمة
يا واحة في الصحراء
يا خصلة يا قمرة
يا بشارة يا بكرة
يا سمح يا زين
يا غابة قمحية
مشرورة فوق البلود
زي الصباحية
يا مزرعة باباي
غضبة الهبباي
يا نخلة مسقية
من ريق دبيشية
يا مقطعين دوباي
نازلين على الدنيا
أشواق وحنية
ياسمح يا زين
يا ليل ليل وليلية
يا نيل ونيلية
يا مرمي تحت الشمس
للقيلة ضلية
يا سحنة نوبية
يا كلمة عربية
يا وشمة زنجية
**********************
البوابة 
وننتظر منك المزيد