صلاح ادريس
عضو شـــغـــا ل
عدد الرسائل : 124
العمر : 73
مزاج : 
الدولة : 
تاريخ التسجيل : 07/08/2009
 | | موضوع: الحزب ده حايجننى !! الأحد يونيو 06, 2010 1:43 am | |
| [size=25]الحزب ده حايجننــــى !!
ــــــــــــــــــــــــــــــــــــــــــــــــــ ـــــ
رقم الموضوع :- ( 64 )
التاريــــــــخ :- الأحد 6 يونيه 2010
أسم الموضوع :- الحزب ده حايجننــى !!
أسم الكاتــــب :- صــلاح إدريــــــس
التصنيـــــــــف :- مقـــــــــال
***************
مع الأعتذار للفنانة صباح والفنان الكبير فؤاد المهندس لإستعارة أسم مقالى من أغنيتهم الشهيرة ( الراجل ده حايجننى .. ضيع مفاتيح عقلى منى !! )
لأن أكيد فيه حاجة غلط أحنا مش فاهمينها !! دلوقت ياجماعة الخير عندنا 3 أنتخابات هامة فى السنة ونص الجايين ( الشورى .. والشعب .. والرئاسة ) .. وفى الدنيا كلها لما يكون فيه أنتخابات واحدة بس .. تقوم الأحزاب اللى داخلة الأنتخابات تلمع نفسها .. وتلمع أعضاؤها .. وتقد م خدمات زيادة .. ومساعدات لناخبيهم .. وينزلوا الشوارع والقرى والنجوع .. ويحلوا مشاكل جماهير الناخبين .. ويترجوهم يحلموا علشان يحققوا لهم أحلامهم !!علشان يضمنوا صوتهم فى الأنتخابات .. ولكن لأننا بلد العجايب فإن اللى بيحصل فى مصر مختلف خالص وعجيب ومريب .. فقبل أنتخابات أهم 3 أنتخابات فى مصر .. تشريعية .. ورئاسية .. تلاقى الحزب الوطنى الحاكم ومعه حكومته الرشيدة .. كل يوم يطلعا أسوأ مافيهما .. نواب قمار .. نواب فتنة طائفية .. وفضائح العلاج على نفقة الدولة .. إنعدام مياه الشرب والرى .. وخضروات مروية بالمجارى .. ووقفات وأعتصامات غطت رصيف مجلس الشعب بالكامل .. وبدأت فى المدن والأقاليم الأخرى ( وقريبا حاتجمع 79.990 مليون مصرى ) .. بتصرخ وتقول جعانين .. عيانيين .. مظلومين . ماهيتنا مش مكفيانا عيش حاف .. مصانعنا بتتباع وحقوقنا ضايعة .. الأسعار ولعت .. الخدمات معدومة .. ده طبعا غير التغيير .. والتبديل والتفصيل فى دوائر أنتخابية على مقاسات خاصة .. زى ماحصل مع النائب المحترم مصطفى بكرى ، رئيس تحرير جريدة الأسبوع .. أو تقسيم المدن والقرى نصفين كأنها حتة تورتة من غير ماندرس ونراعى الأعباء اللى حاتيجى على دماغ الأهالى من هذا التقسيم زى ماحصل فى الوراق ، وجزيرة الدهب ، وطناش ... وده غيير إهمال لحقوق المصريين خارج مصر .. وكل يوم نسمع عن مصرى قتيل هنا أو هناك أو مضروب أو مهان من غير ماحد يدور على حقوقه وكرامته .. ومية النيل اللى مش حانلاقيها لأولادنا وأحفادنا نتيجة لسوء تصرف المسئولين ونظرتهم الضيقة وعقولهم الأضيق .. وغيرها .. وغيرها من المصايب والبلاوى اللى بيعانيها الشعب المصرى وعايزة مجلدات .. والمصيبة أن كل ده بيحصل والأنتخابات الثلاثة على الأبواب .. والحكومة وحزبها .. أو الحزب وحكومته ولا هما هنا .. وودن من طين وودن من عجين !! وأنا بيتهيألى إن فيه إيد خفية داخل الحزب أو الحكومة بتلعب لعبة خبيثة هدفها إسقاط الحزب الحاكم ومعاه حكومته الرشيدة طبعا .. ويارب مايطلعوش علينا بتصريحات عنترية بأن هناك دول وعناصر خارجية تلعب فى الظلام .. وأن مصر مستهدفة .. ويلمحوا لأيران .. وأمريكا وأسرائيل .. ويمكن قطر كمان اللى دايما حاشرينها فى كل المؤامرات على مصر وكأن النملة تخطط لقتل الفيل !! بالذمة ده كلام حد يصدقه !! أو حاجة تانية خالص وهو إنهم ضامنين النتيجة زى العادة ( وربنا يقطع لهم العادة دى ) !! ولو حد فاهم حاجة .. أو عنده السر يقوللى ينوبه فى ثواب !!!
صــلاح إدريـــس
ملحوظة هامة : تم نشر هذه المقالة قبل أنتخابات مجلس الشورى الأخيرة يوم الثلاثاء 1 يونيه 2010 والمقال أتنشر فى عمودى الأسبوعى بالبلدى الفصيح يوم السبت 29 مايو 2010
[/size] | |
|
