رفع الدعم .. وخفض المواطــن !!

رفع الدعم .. وخفض المواطن !!
ــــــــــــــــــــــــــــــــــــــــــــــــ

رقم الموضوع :- ( 59 )
التاريــــــــخ :- الأثنين 24 مايو 2010
أسم الموضوع :- رفع الدعــم .. وخفض المواطن !!
أسم الكاتــــب :- صــلاح إدريــس
التصنيـــــــــف :- مقالــة .
************************************
تم نشره بجريدة ( المصرى اليوم ) عدد اليوم الأثنين 24 مايو 2010
***************

برغم رفضى لنظريات المؤامرة المنتشرة اليومين دول ، إلا أنى المرة دى مضطر للأخذ بها .. لأن الفار بيلعب فى عبى ــ ولازم قطة كبيرة علشان تصطاده ــ !! فقد وافق مجلس الشعب الأسبوع الماضى على قانون مشاركة القطاع الخاص المصرى والأجنبى .. لمشروعات البنية الأساسية ... مثل ( الكهرباء ـ المياه ـ الصرف الصحى ـ السكك الحديدية – القنوات الملاحية وغيرها .. يعنى القطاع الخاص حايتملك ويدير المرافق والشركات دى كلها .. واللى زيها وأكتر منها !! واللى يخوفك أن القانون أعطى الحق للحكومة بإبرام كل العقود دون أى مراقبة لمجلس الشعب أو أخذ رأيه !!.. يعنى الحكومة الرشيدة بجلالة قدرها حاتبقى سيدة قرارها ، ( زى أبن عمها مجلس الشعب ماهو سيد قرارة ) .. يعنى بالبلدى كده ( سلموا الحرامى مفتاح الكرار !! ) واللى يغيظك .. ويرعبك أن القانون تمت الموافقة عليه فى نصف ساعة !! آى والله نصف ساعة !!!!!! دول لو بيتفقوا على حايتغدوا أيه النهاردة كانو أخدوا وقت أكتر من كده !! .. ورغم أن المعارضة كان لها أعتراضات وتعديلات على القانون .. لكن ولا كأنهم موجودين !! والحزب الوطنى الحاكم كالعادة .. ـ وربنا يقطع لهم العادة دى ــ ودن من طين وودن من عجين .. كل ده يخليك تشك !! .. وتتوجس !! .. خصوصا أن وزارة المجتمعات العمرانية ووزارة المالية وقعتا عقد مشاركة مع شركة أوراسكواليا ( مصرية ـ أسبانية ) .. لإنشاء محطة معالجة الصرف الصحى بالقاهرة الجديدة فى أوائل فبراير 2010 !!!! يعنى قبل مايتوافق على القانون القانون بشهور !!! .. وبالأستفسار عن حجة الحكومة لإقرار هذا القانون قالت ــ لافض فوها ــ أنها تريد أن توفر مواردها لدعم المواطن ورفاهيته !!! .. وتناست أن مصلحة المواطن فى تنوع السلع والخدمات ، زى ماحصل كده مع شركات المحمول .. وقت ماكان هناك شركة واحدة محتكرة كان سعر الدقيقة 150 قرشا !! لكن دلوقت بعد مادخلت شركتين تانيين فى السوق نزل سعر الدقيقة لـ 15 قرشا وأحيانا أقل !! ولسه حاتنزل أكتر ... إذا المنافسة بتعطي المواطن الحق فى الأختيار ، وبترخص الخدمة أو السلعة .. و الأحتكار معناه سعر مرتفع ، وجودة أقل .. و لو عاجبك ماشى .. مش عاجبك أخبط رأسك فى الحيطة ، وحاتيجى .. حاتيجى وغصب عنك !! و مافيش غيرى !!.. وطبعا 90% من مشروعات البنية الأساسية حاتكون من نصيب الشركات الأجنبية لخبرتها .. وكتر فلوسها .. لأن مشروعات البنية الأساسية دى عايزة خبرات كبيرة .. ومعدات أكبر وأحدث .. والأهم فلوس كتيررررررة جدا !! وطبعا كل ده لاتملكه أغلب الشركات المصرية !! يعنى حايرجع المستعمر لمصر بشكل أستعمار أقتصادى .. وحايتحكموا فينا .. وفى أرزاقنا وفى أكلنا وشربنا وحتى دورات المياه بتاعتنا ( لامؤاخذة ) !!!.. وطبعا لو حصل أى مشكلة بين الحكومة والشركات دى فأبشروا لأن المحاكم الدولية هى المخول بها فض هذه المنازعات بين الشركات والحكومة .. يعنى خسرانين .. خسرانين .. وماتسألنيش ليه ؟ حاأقولك أرجع لقضية رجل الأعمال سياج وأرض طابا اللى طلب تعويض 60 مليون جنيه لسحب الحكومة الأرض منه دون وجه حق !! .. فتشمللت الحكومة ورفضت .. وقالت له روح ألعب بعيد يابنى !! ده أنت كويس اللى طلعت بهدومك !! راح الراجل رافع قضية دولية بره مصر لللتحكيم بينه وبين الحكومة المصرية ( لأنه حاصل على الجنسية الفرنسية تقريبا ) فحكمت له المحكمة بــ حوالى 300 مليون جنيه !! .. فإذا كانت دى أفكارنا .. ودى أمكانيات حكومتنا القانونية والذهنية !! يبقى عمرنا ماحنكسب أى قضية بره مصر !! ونرجع بقى ــ علشان مانتوهش ــ لنظرية المؤامرة اللى بتقول أن الهدف الخفى هو رفع الدعم عن المواطن تدريجيا .. ــ يعنى زى ما بدأ العد التنازلى لإلغاء مجانية التعليم بإلغاء نظام الأنتساب والتوجه للجامعة المفتوحة ــ حسب قرار وزير التعليم العالى من 10 أيام .. وبكره أفكركم .. حاننام ونقوم نلاقى مجانية التعليم ألغيت تماما بحجج كتيرة أولها التكدس للتلاميذ والطلاب .. وسوء التعليم .. والبطالة التى نتجت عن كثرة أعداد الخريجين .. يبقى معلهش ياجماعة لازم نلغى مجانية التعليم علشان نوفر فلوس دعم التعليم لرفاهييييية المواطن !!!! .. والنبى ياأخواننا كفاية رفاهية أحسن الناس سهلت معاها .. بترفه على روحها .. ومش قادرة تمسك نفسها من الرفاهية الزايدة والسايبة اللى عماله تخرررررر !! ومش نافع معاها كل أدوية الأسهال !! .. ومايهمنا دلوقت حول قانون مشاركة القطاع الخاص لمشروعات البنية الأساسية السؤال المهم هل هذا القانون هو إتجاه لزيادة الدعم زى مابتقول الحكومة ؟ .. ولا لإلغاء الدعم زى مابيقول الناس الوحشين بتوع نظرية المؤامرة ؟ ربنا يخيب ظننا الأسود !! ولو أنى مش شايف سواد أكتر من كده .. والدنيا ضلمة كحل ياجماعة .. حد يولع شمعة ربنا يكرمكم !!
صــلاح إدريــس
salahedris@gmail.com