طرقات فى الجبل .. جديد الأبنودى .

طرقات فى الجبل – للأبنودى .

رقم الموضوع :- ( 27 )
التاريــــــــخ :- الأربعاء 11 فبراير 2010
أسم الموضوع :- طرقات فى الجبل .
أسم الكاتب :- الشاعر الكبير / عبد الرحمن الأبنودى .
التصنيـــــف :- شعر
المصــــــــدر :- المصرى اليوم الثلاثاء 9 فبراير 2010

*****************************************
طرقات فى الجبل ..
للأبنــودى
ــــــــــــــــــــــــــــــــــــــــــــــــــ ـــــــــــــــ

أهلى وناسى وأصدقائى الأعزاء ..

أنا وأنتم شبه متفقين على أن للأبنودى الأفضلية والأولوية .. فحين يظهر له أى عمل شعرى جديد .. تختفى وتتلاشى أمامه أى موضوعات أخرى .. لذا فإننى أنقل لكم اليوم قصيدة جديدة للأبنودى .. صاغها بمناسبة الاحتفاء بانتهاء مشروع إيصال النيل من سوهاج وأسيوط وقنا للبحر الأحمر بواسطة طرق حديثة استلزمت جهداً غير محدود، لا يدرك مشقته سوى إنسان تلك المناطق، كتب الشاعر الكبير عبدالرحمن الأبنودى، ابن الصعيد الأشهر، صورة شعرية عبارة عن مجموعة من المواويل يلقيها بصوته مع أربع أغنيات من ألحان الموسيقار
يقول شاعرنا الأبنودى.فى رائعته الجديدة
( معجزة الجبــل )
****
بأكتافنا بأيادينا
بقوة عزم ما فينا
صعيدنا واحنا أدرى بُهْ
بنتكاتَر على بابُه
وبنمد فى جسد همْدان
هنا شريان وهنا شريان
بنحميه لجل يحمينا
بنحييه لجل يحيينا.
سنين وسنين
تيجى وتروح
ما حدش مدّ يدُّه إليه
يبان همدان وهوَّه الروح
سنين وسنين عَدوا عليه
وهو زى ما هُو يا خال
بيشكى لربه سوء الحال
ألم شِلْناه فى أغانينا
وآهةِ الحسرة تحكينا
وبعد سنين سمعنا نداه
عزمنا أمرنا وجينا
هنا شريان وهنا شريان
بنحميه لجل يحمينا
بنحييه لجل يحيينا.
■ ■ ■
سِكنَّا ضفتك يا نيل
نزيد احنا الأراضى تِقل
رقدنا تحت توت ونخيل
وخدنا ع الرُّقاد فى الضل
ومالناش بحر
مالناش بر
زمن ثابت كإنه ما مرّ
وجمَّعنا وحركناه
وقلنا: «إصحى يا ولداه
يا أصل العلم جينا بحلم
يحقق حلمنا ويحياه
طرق تبدأ مشاويرها
عشان نستنظروا خيرها
ونربط ع الزمن سيرها
عمل هيغيَّر الدنيا
كإننا فى بلد غيرها
أبونا انت ابو الأمة
وأول من بنى معبد
وأوّل من نقش كلمة
يا ابو الإنجاز يا ابو الحكمة
ولا انت كسول ولا غلبان
نزيح الرقدة قوم بينا
هنا شريان وهنا شريان
بنحميك لجل تحمينا
بنحييك لجل تحيينا.
طرق تمتد فى الصحرا
جبال تنهار
حسن وأحمد وعبدالله
وتَكْرونى وحمْدالله
وحسانى وخلف الله
يخلوا شمسها ضلة
ويدُّوا الرملة لون أخضر
وقَعْدة تحت شجرة توت
حيملوها شجر وبيوت
قرى حوالين طرق تتمد
ويتحول صعيدنا بجد
وتتدفق دما بأبداننا من تانى
نعود تانى نغنى تانى للأوطان
■ ■ ■
ومهما كانت العلة
حاجات من دى بتشفينا
تطعمنا وتسقينا
ولادك يا صعيد جولك
بيحموك لجل تحمينا
بيحيوك لجل تحيينا.
■ ■ ■
صِحى الصعيد لما دقوا الباب وقالوا: «اصحَى»
بَدل ارتيابه التاريخى حس بالفرحة
متروك فى ضل التاريخ عشرات سنين ميات
وعنيه تراقب بصمْت الجاية والرايحة.
■ ■ ■
وقف الصعيد يرقب المشهد وِهُو صامت
الصحرا دى عن خُطا الإنسان كتير صامت
لقيها جَد انتشى مَد الخُطى يشارك
وقال يا صحرا قيامتِك فى الصعيد قامِت.
■ ■ ■
كان الصعيد متكى تحت السجر والضل
العام ورا العام ما بانش عليه فى يوم هيمِلّ
والصبر شيلةْ قرون شالها على اكتافُه
لا عِرِف فى يوم يشتكى ولا من حُموله يكل.
■ ■ ■
ما لسه فاكرين يا ناس أيام بنينا السد
النية فى القلب كانت والجهاد فى اليد
الكهربا والمياه والزرع طول العام
نفس الكلام النهارده والمسائل جد.
■ ■ ■
تشرق شموس الأمل على دايرة النسيان
تنوَّر الأرض تلمس فرحة الإنسان
إذا نوّرت لا جرايم تار ولا إرهاب
أبشر يا وادى الصعيد لكل فجر أذان.
■ ■ ■
يا مصر مدى إيديكى نبوسها ونبوسك
إحنا اللى غنينا طلعت فى السما شموسك
إحنا ولاد صبْروا ع الحلوة وع المرة
وكل ما تعلمينا نحفظوا دروسك.

أختيار وتعليق
صـــلاح إدريــس

» عضو جديد
» انا عضو جديد
» عضو جديد
» عضو جديد
» ضيف جديد