بســــم الله الرحمـــــن الرحيــــــــم
أسم الموضوع :- قرش تشتريه .. وقرش يشتريك .. وقرش ياكلك!!
أسمالكاتــــب :- صــلاح إدريــس
رقم الموضوع :- (101 )
التاريــــــــخ :- الأربعاء 8 ديسمبر 2010
****************
أهلى وناسى وأصدقائى الأعزاء ..
لأول مرة سأقوم بنشر مقالى بالمنتدي وبمدونتى الشخصية قبل نشره بالجرائد .. فعادة أقوم بالعكس .. ولكن لأن الموضوع هام جدا .. وقالقنى جدا .. وبرغم أن جريدة ( الأتجاه المعاكس ) حجزت لى بالفعل صفحة كاملة للموضوع فى عدد الأسبوع القادم .. إلا أننى لم أطق صبرا .. لعرضه عليكم .. والأستماع لآراؤكم ورؤاكم نشرت.. ولأن عندى وجهة نظر مختلفة خالص عن كل مايقال وينشر عن الموضوع ..و يمكن أكون غلطان .. ويارب أكون غلطان !!
****
قرش تشتريه .. وقرش يشتريك .. وقرش ياكلك !
ــــــــــــــــــــــــــــــــــــــــــــــــــ ــــــــــــــــــــــــــــــ
يظهر أن أخى وصديقى العزيز أحمد عيسى بدير رئيس مجلس الإدارة ، ورئيس تحرير الجريدة عجبه كلامى بالعامية .. ولمس إقبال القراء على هذه المقالات .. علشان كده أتعطف علىّ بهذه الصفحة كاملة بعنوان رئيسى هو ( بالبلدى الفصيح ) .. وكل ما ربنا يفتح عليّ بكلمتين مهمين أنشرهم فيها .. فشكرا جزيلا ياريــــس ( قصدى رئيس التحرير طبعا .. وأوعى مخك يوديك لبعيد أحسن الحكاية مش ناقصة !! ) .
حكايتنا النهاردة عن القرش !! والقروش أنواع .. فيه قرش بتشتريه من جيبك .. ويدخل من نخاشيشك علشان يخدرك ويدمر دماغك ... وفيه قرش هو اللى بيشتريك وبرضه عن طريق جيبك بس الفاضى !! لما تبيع صوتك ونفسك فى الأنتخابات..!! و ده برضه بيدمر حياتك كلها !! حريتك وديمقراطيتك وحقك فى لقمة عيش كريمة !! .. وفيه قرش تالت هو ده بطل حكايتنا .. بس علشان نوصل له لازم أحكى لكم حكايتين تانيين لأنهم حايكونوا دليلنا وطريقنا اللى يوصلنا للحكالية التالتة .
الحكاية الأولى كانت من عشر سنين تقريبا ويمكن أكتر .. وقبل ماتتقنن مراكز الغوص ويحطوا لها الضوابط والقوانين الملزمة .. وأن تكون تبعيتها لوزارة السياحة .. فى الوقت ده كان أى غطاس أجنبى ممكن ييجى عن طريق طابا قادما من اللى ماتتسماش .. ومعاه شلة غواصين صحابة من الغواصين ستات ورجاله ، ومعاهم عربية كبيرة بيسكنوا وياكلوا فيها أسمها ( تريللر أو كرافان ) والعربيات دى كبيرة مجهزة من مجاميعه يابنى .. بوتجاز ، وتلاجة ،ومعدات طبخ .. وسراير ، وبالمرة معدات غوص كاملة .. وقبل ده كله زادهم وزوادهم من أكل وشرب وخمور وخلافة بكميات تكفيهم المدة اللى حايقعدوها وزيادة ، وكانوا بسلامتهم يختاروا أى مكان عاوزينة فى سيناء وينصبوا نصبتهم ( قصدى خيمتهم وأحيانا خيامهم لو عددهم كبير ) .. وهاتك ياأكل وشرب .. وغوص فى أجمل شواطئنا .. وبالليل رقص ومسخرة .. وكل ده لله والوطن .. يعنى من غير مايكلفوا نفسهم ولا مليم !! لا فى الغوص ومعداته .. ولا الأكل .. ولا حتى شربة ميه .. ولا حق الدولة فى أستغلال شواطئها ومياهها فى السباحة والغوص .
وفى يوم أسود ماطلعتلوش شمس جانى واحد سايح ألمانى عاشق لتراب مصر .. وهو يصرخ ويقول ألحق بلغ السلطات المصرية أن فيه أسرائيليين بيدمروا كنوزكم الغنية من الشعاب المرجانية .. وهى بترولكم ومية حياتكم .. وقال أنه شاف مجموعة منهم بتضغط بقوة على ( طاولات الشعاب المرجانية ــ THE CORAL TABLE ) ويكسروها متعمدين .. وأنهم كسروا أمام عينه عدد كبير من الشعاب دى .. (وطاولة الشعاب) دى عبارة عن شكل دائرى زى قرص الترابيزة وأحجامه مختلفة بسمك من 5ـ 10 سم ونازلة مخروطة كأنها طاولة بالضبط .. وأحجامها مختلفة بسمك من 5ـ 10 سم .. ولو دوست عليها تتكسر فورا !!
واللى يغيظك ويفرسك ويطلع الدم فى نافوخك أن الشعاب المرجانية دى بتكبر بحجم سنتيمتر واحد كل عشر سنين !!
آى والله سنتيمتر واحد فى العشر سنين .. وبعض الشعاب بيكبر السنتيمتر الواحد فى 100 سنة !!
طبعا شكرت السائح الألمانى جدا على ضميره الحى .. وطلبت منه أن يكتب شهادته ويوقعها حتى تكون مستندا رسميا أقدر أستخدمه مع الجهات الرسمية .. وفعلا الراجل ماتأخرش وكتب الشهادة ووقعها ( الأصل معى حتى الآن ) .. وأخذتها جرى على محافظ جنوب سيناء وقتها اللواء مصطفى عفيفى وكان لسه جديد ومابقالوش كام شهر .. ولأنى كنت رئيس لجنة السياحة فى المجلس الشعبى المحلى لمحافظة جنوب سيناء فقد تقدمت فورا بطلب إحاطة للمحافظ .. وشرحت الموضوع بكامله كما شرحته لكم بالضبط .. ووعدنى ووعد المجلس بإتخاذ الأجراءات اللازمة فورا .. وقبل مايتخذ أى إجراءات أنتشر الخبر ولقيت جريدة الأهرام ومجلة نصف الدنيا بيستفسروا عن الموضوع وعملوا معايا لقاء وتم نشره .. وبعد ماالناس قرأت الموضوع أتصل بى عضو مجلس شعب عن دائرة الوايلى الكبير بالقاهرة وطلب كل التفاصيل والمستندات وأرسلتها له بالفعل .. وتقدم بناء عليها بأستجواب لوزير السياحة وقتها الدكتور ممدوح البلتاجى ــ على ماأتذكر ــ وبالفعل تم أتخاذ الأجراءات اللازمة فورا ..
وتم تقنين مراكز الغوص .. ولم يعد يسمح لهذا النوع من السياحة بالتجول كما تشاء .. وألزموا كل الغواصين القادمين لمصر بضرورة الغوص عبر مراكز الغوص المنتشرة فى كل مكان وتخضع للسلطات المصرية .. أما صحابنا البعدا اللى مايتسموش هربوا طبعا بمجرد ماواحد قاللهم على الزوبعة اللى حاصلة بسببهم !!
ويبقى فاضل السؤال اللى لازم تسألوه !! وهو هما بيعملوا كده ليه ؟ اقولكم .. طبيعة شواطىء خليج السويس والعقبة من قبل شرم الشيخ بشوية ولغاية آخر مدينة إيلات الأسرائيلية ويمكن بعدها بشوية هى طبيعة واحدة متشابهة .. ومش متشابهة بس لكن دى متطابقة كمان !! يبقى لما تتكسر شعابنا المرجانية اللى هى بترولنا زى ماقال السائح الألمانى يبقى حاتتغير نظرة السائح الأوربى لنا .. وحايبصوا لنا كشعوب مهملة ( بكسر الميم ) مش قادرة تحافظ على ثرواتها الطبيعية أو ثروتها من السياح اللى بيمثلوا بمصروفاتهم المباشرة وغير المباشرة واحدة من أهم مقومات الأقتصاد المصرى .. وأننا مش مهتمين بتوفير سبل المتعة السياحية الطبيعية اللى المفروض نوفرها له و اللى جاى مخصوص علشانها .. ده غير أن بتدمير الشعاب المرجانية مش حايفضل عندنا حاجة لسياح رياضة الغوص والشواطىء ييجوا علشانها !! ومايبقاش أمامهم إلا البديل الطبيعى ويكون منطقة مشابهة ودى معروفة فين طبعا !! ومش حاأقول لكم فين وحاأسيبكم تخمّنوا !!
وعايز أختم الحكاية الأولانية دى بكلمتين حازقنى قوى وهو أن أسرائيل دايما تخطط لـ 50 ــ 100 سنة للأمام !! وأحنا
لسه بنبص تحت رجلينا !! يمكن علشان نتأكد أن رباط الجزمة مربوط !! أو النص نعل اللى مركبينة للجزة شغّال .!! أو يمكن بنبص على الكالو اللى فى رجلينا والجزة الضيقة كتمت على نفسه وولعته نار .. زى ماكل حاجة حوالينا كاتمة على نفسنا .!! ولغاية هنا وخلصت الحكاية الأولى .
والحكاية التانية عن دولفين جاءنا زائرا لمنطقة اللاجونا بدهب .. وعجبه الحال فى المنطقة الرملية اللى قدام القرى السياحية .. وفرح به السائحين وأهل دهب .. وبعد ماعدى يومين وهو لسه موجود .. أبتدأت الناس تفكر وترتب وتحلم وتتمنى .. !! أيه اللى حايحصل لدهب وأستثماراتها لو الدولفين ده قعد عندنا على طول .. خصوصا أن كان فيه فى الوقت ده برضه دولفين تانى فى نويبع .. وتولى رعايته واحد من أبناء نويبع وهو ( أخرس ) .. وكان سبب سعده وهناه .. فقد أشتهر وأنتشر أسمه على صفحات الجرائد والمجلات الأوربية .. وأنتعشت المنطقة .. وأصبح سيرك بحرى مفتوح يسترزق منه هذا الصياد المصرى وأهل نويبع كلهم .. وبدأت الشركات السياحية تضع زيارة الدولفين على برامجها السياحية وأزدهرت السياحة فى نويبع وسجلت الفترة دى أعلى معدلات سياحية .. وكان أملنا أن الدولفين بتاعنا فى دهب يكون حاله كحال أبن عمه دولفين نويبع .. وبدأ الأخ أبراهيم سليمــان صاحب مطعم (بيبى فيش ) وقتها ( فندق باندا حاليا ) .. والحاج جلال دعية صاحب قرية( جنة سيناء) وفنـــــادق سويس إن و الهيلتون ونوفوتيل ..فى وضع الخطط التسويقية الطموحة اللى حاترتفع بنسبة الزيادة فى توافد السياح لمدينة دهب بنسبة قد تزيد عن 70% من السياحة وقتها .. وأستمر دولفيننا العزيز فى السباحة واللعب .. والسياح وأهالى ومستثمرى دهب فى
سعادة وتفاؤل بمستقبل عسل وخصوصا وأن الدولفين قاعد بمزاجه فى المنطقة .. والبحر أمامه مفتوح وممكن يغادر فى أى وقت ... وده لوحده كافى لجذب عشرات الآلاف من السياح .
وبعد مرور 7 أيام على وجود الدولفين جاءنا هادموا اللذات ومفرقى الجماعات .. وهم إمرأة ورجلان من
إسرائيل وأدّعوا أن هذا الدولفين لهم ومقيم معهم على شاطىء إيلات .. وأن أسم الدولفين مش فاكر شمعون ولا ليشع ولا أيه !! .. المهم أنهم قضوا معه حوالى ساعة واحدة .. وبعد مغادرتهم بأربع أو خمس ساعات أختفى الدولفين تماما .. ودورنا عليه بملقاط .. مالقيناهوش ولا حتى لقينا ريحته !! .. وتانى يوم عرفنا من إحدى صديقات الأسرائيليين أن الدولفين رجع سالما لأصحابه اللى كانوا فى زيارته !!!
وكتر الكلام والأقاويل وكلها تنحصر فى أحتمال واحد مالوش تانى .. و هو أنه بوجود التكنولوجيا ( آخر حاجة) فى إسرائيل .. وتقدمهم العلمى المعروف واللى مش مستخبى على حد .. و ممكن .. وبأقول ممكن أن هؤلاء الأسرائيليين يكونوا زرعوا جهاز توجيه ( كالريموت كنترول ) فى جسم الدولفين .. وبعد أبتعادهم بالمسافة المطلوبة يتم أستدعاء الدولفين بهذا الجهاز !! ومش بس كده لكن صديق من خبراء التقنيات الحديثة للأجهزة الدقيقة أكد لى أن أمريكا واسرائيل قد توصلا بالفعل لنوع متقدم من هذه الأجهزة .. بل أنهم يستطيعون التحكم فى مزاج الحيوان سلبا أو إيجابا ( العنف ــ الهدوء ـ المرح ) كويس كده .. طيب قلّلبوها فى دماغكم بقى !! حاتلاقوا كلامى وكلام الناس اللى عايشت الموضوع منطقى وممكن حدوثه بنسبة 80% إن لم يكن أكثر !! وإلا قولولى الدولفين رجع لمكانه فى أسرائيل أزاى بعد زيارة اللى مايتسموش دول بساعات قليلة !!
لغاية هنا وخلصت الحكاية التانية ووصلنا بالسلامة للحكاية التالته والتالتة تابتة .. !!
ففى يوم الأربعاء أول ديسمبر .. هاجمت مجموعة من القروش المفترسة بشراسة عدد 4 سياح روس فى منطقة نصرانى بشرم الشيخ .. وأكلوا أجزاء من أجسامهم ( حسب المصادر الرسمية ) .. والتحقيق الممتاز اللى عمله أيمن أبو زيد لجريدة المصرى
اليوم عدد 3 ديسمبر وأتكلم فيه مع وزير البيئة .. المهندس ماجد جورج .. ومع محافظ جنوب سيناء الهمام اللواء محمد عبد الفضيل شوشة .. وعدد من المسئولين والمهتمين ورجال الأعمال وكلهم قالوا أن هذه الظاهرة غريبة على شواطئنا .. وأنه لم تقع سوى 4 حالات مشابهة طوال 20 عاما فى حين أن هذه الحوادث تتكرر فى أستراليا وأمريكا من 20 ـ 25 مرة سنويا .. ولكن للحيطة والحذر منعت السلطات السباحة لمدة 48 ساعة بشواطىء شرم الشيخ .. ثم أعقبتها بـ 24 ساعة أخر ى .. وبعد نشر هذا التحقيق طلع أخواننا المسئولين عن البيئة فى الجرائد ووسائل الأعلام يقولوا أنه تم نظافة البحر تماما .. وأصطدنا قرشين ودبحناهم وحنطناهم وحطيناهم فى المتحف البحرى وقال وزير البيئة بالنص ( لزيادة الوعى البيئى لدى السياح !! ) .. آل يعنى مش عارف أن الوعى البيئى بيّدرس فى المدارس الأولية للدول المتقدمة اللى أغلب أو كل سياحنا منها .. وأحنا مانعرفش حاجة عن البيئة غير أنها شتيمة .. لما واحدة تقول لواحد ( ياى أنت بيئة ).. المهم ياسادة ياكرام أن سيادته أفاد بأن المشكلة أنتهت .. وتم تنظيف شواطىء شرم الشيخ بالصابون والديتول والماء الساخن .. ورشينا مبيدات وبعدها معطر .. وخلاص مافيش قروش .. لا تهاجم .. ولا حتى تتشرب !! وياللا ياضيوفنا الكر ام أسبحوا ، وبلبطوا ، وهيصوا وأنتم مطمئنين .. ولأن السياح ياولداه خرمانين سباحة وغوص وفاضل لهم يوم ولا أتنين ويغادروا بالسلامة .. صدّقوا هذه التصريحات !! والسذج المساكين دول فاكرين إن تصريحات مسئولينا زى تصريحات مسئوليهم .. وكلامهم زى ورقة البوستة .. وهجموا على البحر هجوم الناخبين على لحمة المرّشحين ونزلوا بالمئات عوم وغطس وبلبطة .. أتارى القرش المكار كان مستخبى وكاتم نفسه فى حتة مدارية .. وشايف المسئولين ومعاونيهم وهم بيدوروا عليه .. وشّم المبيدات والمعطرات وأتكيف قوى .. وأول ما أنتهت الجولة التفتيشية .. أتسحّب بشوييييش .. بشوييييش .. وشاف واحدة سائحة ألمانية 70 سنة .. وهى بتبلبط وفرحانة أنها أخيرا حاتستمتع بالسباحة فى شرم الشيخ قبل سفرها بساعات .. ولأن القرش المكار عارف هى بتفكر فى أيه ومش عايزها تفرح قوى كــده !! راح هاجم عليها بعنف وقسوة فأنتزع قدمها وذراعها وبعض أماكن أخرى بالجسم .. وأخواننا المسئولين على الشاطىء واقفين !! والحقيقة ماكانوش ساكتين .. لأ حرام ... كان كل واحد فيهم ماسك صفيحة وبيخبط عليها ويصرخ .. واحد قالهم ياجماعة حكاية الصفيح دى مع الجراد بس ..رد عليه كبير المسئولبين ياعم ( أركن على جنب ) .. آهى كلها حيوانات !! .. وللأسف الشديد بعد ساعتين تلاتة توفت السائحة الألمانية متأثرة بجراحها .. وشهود الحادث قالوا كلنا أتمنينا أنها تموت أحسن من أن تعيش بالصورة التى خرجت عليها من البحر ..
وقبل ماأوصل للنهاية أنا بأطالب ، وأنبّه ، وأحذر كل فنادقنا فى دهب ، ونويبع ، وطابا ، وكل شواطئنا فى سيناء أن ياخدوا بالهم .. ويعيّـنوا مراقبين ( أكتر من واحد ) لمتابعة رواد فنادقهم على الشاطىء .. ومراقبة البحر .. وتجهيز الشواطىء بأجهزة إنذار عالية ( صوت وضوء ) لتنبيه روادهم من أى خطر جاى من البحر .. وتزويد المراكب أو اليخوت التابعة لهم بأجهزة أتصال حديثة وسريعة وغير قابلة للعطل المفاجىء زى سانفورات القطارات .. وأن يجهزوا غرف عمليات بها فرد أو أثنين عملها مستمر لـ 24 ساعة .. وتكون على أتصال بالمسئولين إياهم !! بس مش علشان يلحقوهم وينقذوهم من القرش المكار
لأنه مش حايحصل !! لكن علشان ينبهوا باقى الفنادق والقرى السياحية بالخبط على الصفيحة .. وأحد المسئولين عن البيئة صرّح بأنهم بيفكروا يستبدلوا الصفيحة بغطى حلتين نحاس لكل موظف بيئة .. وجارى تشكيل لجنة لعمل مناقصة شفافة لتوريد غطيان حلل نحاس لجودتها وصوتها العالى الرنان مما سيوقف تماما أى هجوم متوقع للقروش البحرية .. مش الأرضية !!
وأنا عايز أقول كمان للفنادق والقرى اللى بعيدة عن الشواطىء أنهم يعملوا نفس التجهيزات .. مع أنهم بعيد عن البحر !! لكن أنتم لاحظتم الذكاء الشديد للقرش اللى أستطاع أن يخمّ السادة المسئولين .. ويضحك عليهم .. ويطلع لهم لسانه .. ومش بعيد يضحك عليهم تانى ويهاجم المرة دى من البر!!!!.
ونفس المسئولين ومن غير مايتكسفوا طلعوا تانى وقالوا أحنا قررنا الأستعانة بخبراء فى الحيوانات البحرية لبحث السبب الرئيسى لتغيير مزاج القرش .. وخلاّه زعلان قوى كده .. وـ أتغير فى سلوكياته وأخلاقه .. حلو قوى قرّبنا نوصل .. معلهش أستحملونى شوية .. طيب ياجماعة الخير المهم دلوقت أيه اللى حصل وجاب القروش المفترسة دى لشواطئنا ؟ وأيه اللى غيّر مزاجها وقلّبها علينا بالشكل ده ؟ أيه... بتقولوا أيه ؟ طبعا
عندكم حق تفكروا فى اللى أنا فكرت فيه !! لأن ياأخوانا بالفكاكة كده كلنا عارفين أن ضابط البوليس مابيقبضش على حد إلا إذا كان مشتبه فيه ، وعمل تصرف شكك الضابط فيه .. وبعد كده وكيل النيابة بيحقق مع المتهم .. ويشوف الدلائل والملابسات .. وبرضه السوابق .. وبناء على توفر كل ده يأمر بالحبس الأحتياطى والتحويل للمحكمة لو ثبتت الإدانة أو الأفراج من النيابة لو ثبت البراءة .. وأحنا عندنا متهم واضح أمامنا .. وعنده سوابق ، وسوابقه سابقاه !!.. ومن الممكن أن يزرع أجهزة توجيه فى جسم القروش ( وهى أجهزة دقيقة لاتتعدى السنتيمترات القليلة ) .. وبعد مايزرعها يروح باعتها لنا .. طبعا مش لتحيتنا أو علشان يتونس بينا أحنا وضيوفنا الأجانب لكن لتطفيش السياح من سيناء .. وتوجههم للبديل الطبيعى وهو إيلات والشواطىء الأسرائيلية .. وخصوصا أن موسمنا السياحى السنة دى كان مرتفع وزى الفل .. والناس متفائلة جدا بمستقبل جاى أحسن وأحسن .. ياريت تفكّروا فيها .. وتشغلوا دماغكم .. واللى يعرف منكم أو من المسئولين المحترمين يتفضل يرد على السؤال الواضح والصريح : هل من الممكن توجيه هذه الأسماك سلبا وإيجابا بمايخدم مصالح المتحكم فى الريموت كونترول بتاعه ؟ وبرضه يتحكم فى مزاجه ويوقع بينا وبينه .. ويخليه ينسى السمك والجمبرى اللى بيننا ..!! وأنا منتظر الأجابة .. ويارب يخيب ظنى .. مع أن الظنون الطيبة هى اللى ودتنا فى داهية !! وماحدش يقوللى ياأخى إن نظرتك للأمور سودة ليه كده
لأن لو فيه حد مش شايفها سودة من حوالينا !! يبقى لا مؤاخذة مابيشوفش !!
بقلــــــم
صــلاح إدريـــــــس
زيارتكم .. تسعدنى .. وتشرفنى ..
لمدونتى ( بالبلدى الفصيح )
http://plackprince.blogspot.com/2010/07/blog-post.html
البوابة 
