النيل بعيون نوبية

النيــل بعيــون نوبيــة .
ـــــــــــــــــــــــــ ــــــــــــ
رقم الموضوع :- (65)
التاريــــــــخ :- الثلاثاء 8 يونيه 2010
أسم الموضوع :- النيل .. بعيون نوبية
أسم الكاتــــب :- صــلاح إدريـــــس
التصنيـــــــــف :- مقـــال
****************************************
أهلى وناسى وأصدقائى الأعزاء ..
أتصلت بى جريدة ( المصرى اليوم ) .. للمشاركة فى ملحق خاص عن النيل فى 12 صفحة بمناسبة مرور 6 سنوات على إصدار الجريدة .. بمقالة لاتتعدى الــ 100 كلمة .. يانهار أبيض مائة كلمة فقط !! .. طيب ياجماعة الخير أنتم عارفينى ( لكاك وكلامى كتير ) .. قالولى لأ ياحبيبى .. المرة دى حاتكون مشاركات كتيرة جدا ولازم عدد الكلمات يكون محدد لإعطاء فرصة لكل من تم أختيارهم للتعبير عن مدى تأثير النيل عليهم .. لأن الملحق بصفحاته الـ 12 يتناول عدة تحقيقات هامة عن النيل .. والمقالات ستكون على هوامش الصفحات علشان كده لازم تكون قصيرة .. قعدت أفكر وأقول أكتب أيه عن النيل فى 100 كلمة فقط ؟ .. ياترى أكتب عن هيرودوت اللى قال إن مصر هبة النيل .. ولا أقتبس أبيات من القصيدة الرائعة ( النهر الخالد ) .. ولا أحكى حكاية عن الصيادين عايشين على سطح هذا النيل العظيم .. وزيسترزقون من أعماقه .. ولا عن مشكلة المياه بيننا وبين دول المنبع فى أفريقيا .. فأكتشفت أننى لكى أكتب عن أى من هذه الموضوعات لن تكون عدد الكلمات أقل من 1000 كلمة مش 100 بس !! .. وبينى وبينكم ده أصعب مقال كتبته ( لو أعتبرتم التلغراف ده مقال !! ) .. وأخذ منى وقت طويل جدا .. إلا أن هدانى الله وتذكرت كلمات جدتى ـ يرحمها الله ـ عن النوبة القديمة .. وحديثها الدائم عنها زى كل أهلنا اللى عاشوا هناك .. وحتى اللى سمعوا وكونوا صورة فى خيالهم جميلة ومبهجة فى خيالهم عن النوبة القديمة .. وبيحكوها لأولادهم عن النوبة القديمة اللى ماشافوهاش بعيونهم .. لكن بالتأكيد شافوها بقلوبهم .. بيحكوا عن الحنين لبيوتنا القديمة .. وأرتباطنا بالنيل فى كل حياتنا فهو بالنسبة لنا أسلوب حياة قبل أن يكون شريان لها .. وقمت بصياغة كلمات جدتى النوبية البسيطة إلى كلمات موجزة ومعبرة بما نشعر به جميعا ( أبناء النوبة ) نحو النهر الخالد .. نهر النيل العظيم .. ويارب يعجبكم المقال البسيط ده .
**********************
تم نشرالمقال بجريدة المصرى اليوم عدد الأثنين 7 يونيه 2010
النيل بعيون نوبية .
ـــــــــــــــــــــــــ ـــــــ
تحكى جدتى عن النيل فتقول : أن عطشى لم يكن يرويه إلا شربة ماء منه .. أرفعها بكفى فتطالعنى خطوط يدي من صفاءه .. باردة عذبة تتسرب لشرايينى كماء مقدس.. أفتح باب منزلى أجد النيل أول ما تطالعه عينى .. لايبعدنى عنه إلا خطوات من الرمال الذهبية .. تلمع تحت الشمس وكأن طريقى للنيل مفروشا بسلاسل من دهب .. منه مشربنا .. ومأكلنا .. به تنتقل تجارتنا وأخبارنا .. هو حضن ابطالنا وملاحم نضالنا .. شاهد عشقنا وملهم أشعارنا .. فقدنا كل ذلك بهجرتنا .. أما آن أن تعود لنا حياتنا بعودتنا لأحضانه الدافئة الحانية .
بقلــــــــــم
صــلاح إدريـــس

» النيل .. عايز حريفة !!
» النيل .. يرفع راية العصيان .
» عغادات نوبية
» دعوة نوبية .. من أجل مصر .
» عضوة مش نوبية