طناش .. مصطفى بكرى ..و مآذن سويسرا

طناش مصطفى بكرى ومآذن سويسرا !!
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــ
رقم الموضوع :- ( 71 )
التاريــــــــخ :- الأحد 25 يونيه 2010
أسم الموضوع :- طناش مصطفى بكرى ومآذن سويسرا .
أسم الكاتــــب :- صــلاح إدريـــس
التصنيـــــــــف :- مقــال .
*******************
تم نشر المقال بعمودى الأسبوعى ( بالبلدى الفصيح )
عدد السبت 12 يونيه 2010
***********
كنت فى زيارة عمل لسويسرا .. وقت أزمة مآذن الجوامع هناك .. والحكاية ببساطة أن الحكومة السويسرية ( المحترمة !! ) ممثلة فى مجالسها التشريعية والتنفيذية على مستوى الدولة و مستوى المدن .. لما تيجى تاخد قرار يتعلق بالمواطن فى هذه المدينة أو تلك .. كأن يكون متعلقا مثلا بتوسيع شارع .. أو بناء كوبرى .. .. أو أى أمر يتعلق بهذا المواطن السويسرى ( المحترم !! ) .. بتعمل أستفتاء عام وتشرح فيه الموضوع بكل تفاصيله بسلبياته وإيجابياته .. وشعب المدينة بكامله يذهب لصناديق الأقتراع .. ويقول رأيه بالموافقة ، أو الرفض لهذا القرار .. وحسب الأغلبية فالدولة أو رئاسة المدينة تنفذ رأى الأغلبية ( المحترمة !! ).. وهذا ماحدث مع المآذن السويسرية .. فقد أشتكى بعض السويسريين من صوت الميكروفونات العالى والمزعج فجرا .. حصوصا ودول ناس بيقوموا من النوم 6 صباحا علشان يستعدوا للذهاب لأعمالهم فى الموعد و دون تأخير .. ويعودوا لبيوتهم بعد أنتهاء أعمالهم ليمارسوا حياتهم العائلية .. يتعشوا الساعة 6 مساء .. ويقرأوا أو يتمشوا شوية .. أو خلافه .. ثم يخلدون للنوم بحد أقصى الساعة العاشرة مساء .. طبعا ماعدا أجازتهم الأسبوعية .. مش زى عندنا هنا .. تلاقى الناس فى الشارع 24 ساعة من غير ماتقدر تفرق هما أكتر بالليل ولا بالنهار .. فى الفجر ولا فى أول الليل .. الناس مليانة فى الشوارع .. والمحلات والمطاعم كلها فاتحة .. وليلنا نهار ونهارنا ليل .. وبقى عندنا مخلوق يقولك أنا كائن ليلى .. وهذا الكائن الليلى لايقوم من النوم إلا الساعة 3 أو 4 مساء وعلى فكرة فيه من هذا النوع كثير .. وهم فى أزدياد !! المهم أن الحكومة السويسرية عملت أستفتاء هل توافق على بناء مزيد من المآذن المطلوب الترخيص ببناءها ؟ .. ولا لأ .. فكانت الأغلبية حوالى 65% برفض بناء المآذن .. وكعادة الحكومة السويسرية ( المحترمة !! ) .. أمتثلت لرأى الأغلبية ..
تعالوا بقى نشوف أحنا حصل عندنا أيه !!.. النائب المحترم والكاتب الشريف مصطفى بكرى والصعيدى الجدع .. كان نائبا لدائرة حلوان .. ومحبوب من أهل دائرته .. ويقدم لهم كل الخدمات الممكنة .. وفى فترة تمثيله لهم تحققت إنجازات كثيرة ولكن لأنه رجل شريف .. ونائب قوى .. ومعارض شرس .. ماعجبش رجالة الحزب الوطنى ( المحترم جدا جدا !!!!!! ) .. وقرروا تصفيته .. ونام مصطفى بكرى وأستيقظ ليجد نفسه بدون دائرة أنتخابية .. ( أتنشلت منه وهو نايم !! ) وتوزعت دائرته بين القبائل .. وبعد ماكانت حلوان والتبين و15 مايو هما الدائرتان 24 و 25 .. فجأة خلوها دائرة واحدة هى 24 وهى دائرة سيد مشعل وزير الأنتاج الحربى .. ومعقل المصانع الحربية .. اللى كل العاملين فيها يدينون بالولاء لوزيرهم بالطبع .. لاسيما وأنه رجل شريف ومحترم أيضا ؟ وأصبح بكرى بلا دائرة ياولداه !! من غير ماحد يسأله .. أو يكلف نفسه ويسأل أهل الدائرة أنتم عايزين أيه ؟ وأيه الأصلح لكم ؟ .. لكن الأهم هنا مش الناس .. لكن المصالح الخاصة بالحزب وحسب رؤية قياداته ( المحترمة جدا جدا جدا جدا !!) .. ويروح اهل الدايرة فى ستين داهيه !!
ونفس الشىء حصل بشكل تانى فى الوراق .. فقد نام الناس وصحوا الصبح لقوا نفسهم فى محافظة تانية .. ( ماهو كل قرارت حكومتنا الرشيدة ( المحترمة جدا جدا جدا !! ) ماتتاخدش إلا بالليل فى الطراوة وهما بيشيشوا !ّ! ) فقد أصدر رئيس الوزراء بالليل قرار بتقسيم جزيرة محمد بالوراق لنصفين بالتساوى زى مايكون بيقطع تورته .. نص الكريمة أعطاه لمحافظة الجيزة .. والنص الثانى بالشيكولاتة لمحافظة 6 أكتوبر .. ونقل طناش بالكامل لأكتوبر !! ومن غير مايسأل الناس !! أو حتى يسأل نفسه عن صحة القرار من عدمه !! حايحصل أيه فى أشغال الناس .. ومدارس الأولاد ؟ .. والخدمات للناس دول حاتتأثر ولا لأ .. وطبعا النتيجة معروفة فقد تظاهر أهل الوراق كلهم .. وأغلقوا الطريق الدولى .. وعطلوا الطريق أكثر من 8 ساعات .. وأشتبكوا مع الأمن .. وأتسجن منهم 65 شخصا .. لأنهم بيطالبوا بحقوقهم الطبيعية .. والدستورية .. بالتمتع بالخدمات داخل قراهم .. وعلى مقربة منهم .. ومايسافروش عشرات الكيلومترات علشان يمضوا ورقة .. أو يعالجوا طفل ..
عرفتم بقى الفرق بين مآذن سويسرا .. ومصطفى بكرى .. وطناش .. أنا من رأيى نعمل طناش على الموضوع ده أحسن الضغط زاد عندى .. وأكيد عندكم أيضا .
بقلـــم
صــلاح إدريـــس

» الحضرى يهروب الى سويسرا. والاهلى يشجب ويندد!!!!!!!
» مصطفى يونس: الحضري يقترب من سيون
» مجموعة أغاني للفنان السوداني مصطفى مضوي
» مجموعة اغاني للفنان السوداني مصطفى سيد أحمد
» مجموعة أغاني للفنان السوداني جمال مصطفى (جمال فرفور)