((((توماس))))((((عافية))))

نوبى اصيل
 
اليوميةاليومية  البوابةالبوابة  س .و .جس .و .ج  بحـثبحـث  التسجيلالتسجيل  المجموعاتالمجموعات  دخول  الرئيسيةالرئيسية  مكتبة الصورمكتبة الصور  </a><hr></a><hr>  
المواضيع الأخيرة
» الامبراطور ..........لعبه جديده
الجمعة أبريل 26, 2013 1:40 pm من طرف احمد التوماسكى

» مكتبه الفنان :: اسامه الروس ::
السبت مارس 03, 2012 3:07 pm من طرف مصطفي توماسوعافية

» الـبـيـسمـبـيـس
الخميس أغسطس 11, 2011 1:37 pm من طرف جنة ابوسمبل

» بيسمبيس
الخميس أغسطس 11, 2011 1:04 am من طرف جنة ابوسمبل

» أم الدرداء تطلب زوجا فى الدنيا .. زوجا فى الجنة .
الخميس أبريل 28, 2011 10:48 pm من طرف صلاح ادريس

» تهنئة بسلامة الخروج الي حضن الاهل والاسرة
الأربعاء أبريل 27, 2011 10:48 am من طرف أبو يحي

» الي روح بو عزيزي
الجمعة مارس 18, 2011 11:26 am من طرف احمد التوماسكى

» موضوع هام جدا للمناقشة
الأربعاء مارس 16, 2011 7:27 pm من طرف صلاح ادريس

» دعوة لثورة أكبر
الإثنين فبراير 21, 2011 11:51 pm من طرف صلاح ادريس


شاطر | 
 

 حراجى القط ( الرسالة الثانية )

اذهب الى الأسفل 
كاتب الموضوعرسالة
صلاح ادريس
عضو شـــغـــا ل
عضو شـــغـــا ل
avatar

ذكر
عدد الرسائل : 124
العمر : 67
مزاج :
الدولة :
تاريخ التسجيل : 07/08/2009

مُساهمةموضوع: حراجى القط ( الرسالة الثانية )   الإثنين فبراير 08, 2010 1:05 am



[b]رسالة حراجى القط الثانية .
ـــــــــــــــــــــــــــــــــــــــــــــــــ

رقم الموضوع :- ( 26 )
التاريــــــــخ :- الأحد 7 فبراير2010
أسم الموضوع :- رسالة حراجى القط الثانية والرد عليها .
أسم الكاتب :- الشاعر الكبير / عبد الرحمن الأبنــودى
التصنيـــــف :- شعــــــــر
**********************

أهلى وناسى وأصدقائى الأعزاء ..
إستكمالا لمقالة ( الحكاية .. مش حكاية سد ) .. وبعدها ( رسالة حراجى القط الأولى ) هاأنا حسب وعدى وحسب طلب الكثيرين أنشر الرسالة الثانية ( لحراجى القط ) والأسبوع القادم بإذن الله ( الرسالة الثالثة ) وهكذا وحتى تنتهى رسائل حراجى القط .. ثم ننتقل إلى باقى الأبنوديات وهى قصائد متفرقة .. كل منها وجبة روحية دسمة .. تلمس مشاعرك وشغاف قلبك .. وبرغم أننى نشرت هذه الرسائل منذ عامين تقريبا .. إلا أننى (بأتلكك ) .. ومابأصدق ألاقى أى مناسة لنشر أشعار الأبنودى فألغى فورا ودون تفكير أى موضوعات أخرى .. وأنشر للأبنودى .. لأننى مثل كثيرين منكم عاشق لهذه القامة العالية شعرا ومشاعرا .. وبرضه أسمحوا لى أن أنشر القصيدة ..مع نفس المقدمة التى كتبتها منذ عامين .
********************
مرة ثانية أقدم لكم كلاسكيات الأبنودى ..وهى مجموعة رسايل الأسطى حراجى القط لزوجته فاطنة عبد الغفار ..وهى من أجمل ماأشعر الأبنودى ..وقبل أن أبدأ فى نشر الرسائل .. أسمحوا لى بتقديم صغير لها ( للمرة الثانية لمن لم يتابع الجزء الأول ).. ففى ستينات القرن الماضى .. وقت أن قهرنا الخوف .. والقلق .. وعبرنا للمستقبل ..قرر الرئيس جمال عبد الناصر البدء فى بناء السد العالى بمساعدة سوفيتية كاملة .. بعد أن رفض الأمريكان تمويل بناء السد ... وتم حشد مئات الآلاف من أبناء مصر لبناء السد .. كما فعل أجدادنا عند بناء الأهرام وأبى الهول .. فتم تعيينهم فى أعمال السد المختلفة ( حدادين – نجارين – بناءين – عمال عادية ..وغيرهم الكثير من الحرف المصرية .. وكانت المرتبات عالية فى ذاك الوقت .. فكان الجميع يسعى للعمل بالسد .. وقد يضطرون للغياب عن أسرهم بالشهور الطويلة .. أملا فى تحويشة كبيرة من المال ..تساعدهم فى تحقيق أحلامهم وأحلام أسرهم .. وكان من بينهم بطل قصائد الأبنودى الشهير (حراجى القط ) .. والقصائد هى رسايل ( حراجى القط ) لزوجته ( فاطنة عبد الغفار ) ..وردودها عليه ... وهانحن نبدأ بقراءة رسائل (حراجى القط )
******************
الرســـالة الثانية
*******************
... وكالعادة كتب الأسطى حراجى القط .. على المظروف العنوان ..


الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ


أما بعد ..

فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
سامعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..

زوجك لاوسطى حراجي

*****************************
وعلى طول ردت فاطنة عبد الغفار على جوزها ..وكتبت على المظروف العنوان ..

أسوان
زوجي الغالي
لاوسطى حراجى القط
العامل في السد العالي
أسوان
*****************


وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخي ر والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
إمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم ..
الواد لازمه الكتاب ..
يوم السوق ..
إتدلي هاتي له قلمين بوص .. ودواية .. ولوح ..
وضحك .. بعدين قاللي : لاحسن يطلع لوح
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهالي دي!!
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في ا لمطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع بالسلامه ..
تعمر مصطبتك ..
وتقيد اللنضه في الدار ..

زوجتك
فاطنه أحمد عبد الغفار
جبلاية الفار


*****************************************
وإلى لقاء ممتع جديد ..مع الرسالة الثالثة من حراجى القط .. من السد العالى بأسوان .. لمرته فاطنة عبد الغفار – بجبلاية الفار .

بقلم
صــلاح إدريــــــس


[/b]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الدلوعة التوماسكية
عضو جـــد يـــد
عضو جـــد يـــد


انثى
عدد الرسائل : 8
العمر : 23
المزاج : زهقانة
مزاج :
الدولة :
تاريخ التسجيل : 14/12/2009

مُساهمةموضوع: رد: حراجى القط ( الرسالة الثانية )   الإثنين فبراير 08, 2010 1:25 pm

كتر الله من امثالك يا صلاح[strike][code]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
حراجى القط ( الرسالة الثانية )
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
((((توماس))))((((عافية)))) :: ¤؛°`°؛¤ المنتديات العامه ¤؛°`°؛¤ّ :: °¨¨™¤¦ توماس((الشعر))عافية ¦¤™¨¨°-
انتقل الى: